کرپٹ مافیا کے دفاع کیلئے سیاسی قوت بنانا اسلام نہیں، فردوس عاشق اعوان

اسلام آباد: وزیراعظم کی معاون خصوصی برائے اطلاعات نے مولانا فضل الرحمان کے قومی سطح کے مارچ کا اعلان پر کہا کہ مولانا سے گزارش ہے کہ وہ اسلام آباد کے بجائے اسلام کو نگاہ میں رکھیں۔ تفصیلات کے مطابق معاون خصوصی برائے اطلاعات فردوس عاشق اعوان نے اپنے ٹوئٹر پیغام میں مولانا فضل الرحمان کو تنقید کا نشانہ بناتے ہوئے کہا کہ آپ عمران خان کی عداوت میں مبتلا ہیں،عالم دین ہونے کی حیثیت سے آپ امن و اخوت کو فروغ دیں، عداوت کو نہیں۔ فردوس عاشق اعوان کا کہنا تھا کہ مولانا فضل الرحمان سے گزارش ہے کہ اسلام کو نگاہ میں رکھیں، اسلام آباد کو نہیں، کیونکہ قوم کے بچوں کو کرپٹ مافیا کے دفاع کیلئے سیاسی قوت بنانا اسلام ہے اور نہ ہی جمہوریت۔ دوسری جانب جے یو آئی (ف) کے امیر مولانا فضل الرحمن کا کہنا ہے کہ عید الفطر کے بعد ہماری میزبانی میں آل پارٹیز کانفرنس منعقد ہوگی،جس میں مشترکہ مؤقف کے تحت آئندہ کی حکمت عملی طے کی جائے گی۔ مولانا فضل الرحمٰن کا کہنا تھا کہ پاکستان کی نظریاتی شناخت، عقیدہ ختم نبوت کے تحفظ،مہنگائی کے طوفان کے خلاف ماضی میں کئے گئے ملک گیر ملین مارچ کاسلسلہ آئندہ بھی جاری رہیگا اور جلداسلام آباد میں قومی سطح کا مارچ ہوگا،جس میں دیگر جماعتوں کو بھی خوش آمدید کہا جائے گا۔